巴塞力敌双“马”

一连几日讲咗英超转会情况，今日又转吓讲西甲，不离都係三头马车──巴塞、皇马与马体会。

卫冕嘅巴塞经已签入三名新援，包括两名法国国脚迪尼与乌迪迪，防线更加完整及有足够替补力，另一位就係踢中前场嘅D苏亚雷斯，呢位廿三岁后生仔相当具潜质，否则巴塞都唔会收归旗下；不过，由于三大超级杀手美斯、尼马及苏亚雷斯在阵，相信“D苏”只係做第四前锋，最主要防线上加强兵力，巴塞今季更加强横。

巴塞死对头皇马似乎以不变应万变，至目前为止并无任何大动作，只有摩拉达与哥恩达奥回归球队，之前要争法国中场核心保罗普巴已告吹。冇新球星加盟不特止，皇牌C朗因伤，季初应该唔踢得，皇马开季都几头痛。

马体会暂时只签入克罗地亚国脚维沙尔高一名中场，个人认为对球队起到作用唔大。另一消息係迪亚高哥斯达想回归母会，但一日未离开车路士仍係未知数。马体会要再向巴塞与皇马两大劲敌挑战，前中后三线非要增强实力不可。如以目前情况嚟睇，新一季依然係巴塞天下。