2026世界盃：保留體力唔炒約旦 阿根廷半場細有計_星島日報

喺J組脫穎而出，取得首名資格嘅阿根廷，最後一場分組賽鬥已出局嘅約旦。今場談論焦點，係美斯究竟會唔會上陣，不過從博彩角度就簡單得多，美斯唔上陣就會減弱攻力，美斯上陣亦會就住踢；睇番阿根廷近4場，半場全開1球或以下，1.5球半場細捧得過。（Now 618、616及馬會指定場外投注處周日早上10時直播）文:渡邊年

由於今場變成例行公事，兩軍都可能派副選上陣，尤其阿根廷力求衞冕，領隊史卡朗尼都要畀主力休息，減少美斯上陣時間甚至唔出都在所難免。

球王美斯上陣與否，阿根廷國內都有唔少討論，話唔出嘅當然係要畀佢休息，加上當地氣溫高達攝氏34度，畀39歲嘅老人家抖吓都好應該。不過從另一方面，美斯踢美職儲落唔少Fans，唔少球迷已經一早買晒飛，AT&T球場所有波飛已經賣清光，美斯畀面踢半場都唔定，而且佢亦有可能為衝擊神射手上陣。

保留體力唔炒約旦
不過無論前者定後者，睇番近4場阿根廷賽事，有2場美斯正選，1場後備上陣，1場冇出場，全部半場都係開1球或以下，證明「潘帕斯雄鷹」本身都係就住嚟踢，話晒要衞冕嘅話就要踢8場波，懂得留放係好重要。約旦實力所限，對奧地利及阿爾及利亞都輸，今場只有盡力防守減少失波，同埋睇吓換唔換到美斯件波衫，玩半場細啱數。