2026世界盃：搶首名唔放過哥倫比亞 葡萄牙高哥猛進捧客Ｗ_星島日報

世盃K組尾輪榜首大戰，哥倫比亞硬撼葡萄牙。哥倫比亞已經提早出線，戰意難免下滑，相反葡萄牙上仗回勇大勝，隊長C朗谷埋谷埋終於一吐烏氣，梗係要食住個勢唔好畀佢停，客勝有計。（Now 618及616周日早上7時30分直播）文:法達斯維

哥倫比亞今屆個頭開得幾靚，頭兩輪贏晒全取6分，提早取得出線資格，只係爭在係首名定次名。不過如果有睇波嘅球迷，都睇到哥倫比亞贏波過程有啲驚險，首輪對烏茲別克一度被對手追和，次輪只係險勝剛果民主共和國1粒，而且2仗都靠「帶刀侍衞」丹尼爾蒙路斯建功。前線嘅路易斯迪亞斯、路爾斯蘇亞雷斯表現時好時壞，其中路爾斯蘇亞雷斯更加係帶傷上陣，加上已提早出線，今仗未必搏盡。

搶首名唔放過哥倫比亞
另邊廂，葡萄牙經歷首輪被民主剛果逼和1比1後，面臨巨大壓力下反而令球隊更加團結，尤其係首輪表現差勁嘅C朗，谷埋谷埋成個星期，終於喺上仗對烏茲別克一次過爆發，個人梅開二度，協助球隊大勝5比0，佢唔單止成為首位連續6屆世盃有士哥嘅球員，亦打破之前10場大賽食白果嘅入球荒；特別係此役改用祖奧菲歷斯，呢位C朗嘅艾納斯隊友不斷跑動，的確為隊長製造到更多空間，成為佢反彈關鍵。

雖然葡萄牙依家以4分排第2，領先第3位嘅剛果民主共和國3分，要取得頭2名直接出線資格機會好大。但如果想攞首名，今仗就一定要贏波，大家都知C朗幾咁要威同要面，依家撻番着梗係要食住上，加上葡軍近5場贏4次，要贏哥倫比亞攞首名出線冇難度。