期待巴西奥足

今届欧洲国家盃经已曲终人散，锺意睇波嘅球迷又要“饿波”一段时间，因打紧嘅欧冠盃与欧霸盃外围赛，不但冇得睇，且球队都係不知名嘅“二打六”货色，吸引力亦有限，唯有睇住中超顶吓档。

要睇波就要等即将展开嘅巴西奥运足球赛，巴西以往称为足球王国，惜近年战绩一落千丈，世界排名跌到十名以外，一四年世界盃身为主办国，四强决战一比七大败德国脚下，季军战又吞荷兰三蛋，两场波简直係奇耻大辱，最终只得梗颈四。刚结束嘅美洲国家盃连分组赛都出唔到线，认真令球迷彻底失望，森巴足球要重振雄风，今届奥运男足非要夺金不可。

巴西曾经夺得无数次大赛冠军，唯独奥运男足从未称王，一二年奥运男足只差一步，决赛一比二不敌墨西哥，当年阵中球星如云，尼马、马些路、泰亚高施华、侯克及奥斯卡等，可惜都係与奥运金牌无缘。

对于今届男、女足金牌，巴西寄予厚望，特别係男足，今次再由尼马领军，希望能够首夺奥运男足金牌，阿Ben亦係巴西“粉丝”之一，期待巴西足球可以重振声威。