法國晉級有困“蘭”

法國晉級有困“蘭”

    英倫三島四支球隊在今屆歐國盃決賽周認真爭氣，齊齊殺入十六強，唯一可惜係威爾斯與北愛爾蘭要兄弟相殘展開内戰。咁都好，肯定有一隊入到八強。

    另一隊愛爾蘭就冇咁好彩，十六強就遇上東道主法國，晉級都有一定困難。不過，英倫球隊勝在鬥志高昂，拼勁十足，話知你冠軍級強隊抑或主辦國勁旅，愛爾蘭最緊要有鬥心。法國在三場分組賽表現唔算突出，首戰贏羅馬尼亞贏得驚險，贏阿爾巴尼亞屬正路波，最後一場對瑞士可以話留力，但整體發揮始終欠缺銳利，今場對住以爛打見稱嘅愛爾蘭，法國未必有十足勝算。初盤法國讓一球／球半，捧愛爾蘭至少可執半個盤。

    法國今屆唯一亮點係中場皮耶特，寄予厚望嘅保羅普巴與基士文仍未發揮出威力，整個中場組織能力一般，與昔日以施丹與迪甘斯為核心嘅中場線相比，明顯差一班。愛爾蘭今仗必會以針對性踢法與法國抗衡，中場快速搶截屬於強項，再由攻擊手朗治施以反擊，隨時殺法國一個措手不及。法定時間九十分鐘內法國未必可以擊倒對手。

    推介：法國1:1