德國搶首名喪攻北愛

唔止要贏仲要盡情數
歐國盃C組最後兩場分組賽今晚同時上演，焦點當然係德國同波蘭邊隊搶得小組首名。由於德國上輪0比0悶和波蘭，令對賽成績、對賽入球數字相同，今場兩軍都要盡力爭取更多入球，希望喺總球差取得優勢。黑柴預期雙方都可以大勝，當中德國對北愛爾蘭，應會以舒賀爾尼同馬里奧葛斯孭飛，落重彈藥搶攻，讓球盤德國讓球半/兩球都唔驚，照捧上盤。

（now 651及樂視體育周三凌晨零時直播）

嚟到最後一輪分組賽，好多陰謀論者都會擔心球隊玩走線，不過C組唔會出現呢個問題，德國領隊勒夫已講明，首名出線係志在必得，因為C組首名16強可以留喺法國北部里爾作戰，唔使舟車勞頓，次名就要去南部聖伊天比賽，再者，「日耳曼兵團」上輪和波蘭受到唔少批評，今仗遇弱旅好應該以一場漂亮勝仗壯聲威。

烏克蘭Out咗 波蘭贏面高
德國今仗陣容唔會有太大變動，勒夫仍然力保單箭頭馬里奧葛斯，但左翼方面，舒賀爾尼極有可能取代達斯拿擔正，另外，隊長舒韋恩史迪加都會得到較多上陣時間。北愛爾蘭上仗歷史性贏得決賽周首捷，今仗會用番相同陣容，不過球隊近4次對賽都畀德國大炒，級數相差太遠，就算想輸少啲都難。

同組另一仗烏克蘭對波蘭（now 650及樂視體育周三凌晨零時直播），為咗出線後對手易啲應付，波蘭密謀以較佳得失球超越德國搶走首名，今仗肯定盡情搶攻，星級箭頭羅拔利雲度夫斯基會重新擔起取分重任。對手烏克蘭係今屆大賽最令人失望嘅球隊，而且已經提早出局，隨時畀機會未上過陣嘅副選吸收經驗，今仗波蘭贏面高，仲好有機會大勝對手添！