德军重装战车吐乌气

沉睡两年靠无间道点醒？

C组争霸热门德国今晚喺里尔登场，接受乌克兰挑战！德国于2014世界盃封王后沉睡足两年，表现令人失望，但阵中主力得到乌克兰名将泰摩斯卓克点醒，今晚面对呢支实力次一皮对手都唔会鬆懈，领队勒夫亦的起心肝重装完整战车出击，绝对够料打响头炮，德国让一球，黑柴撑上盘。

（now 651及乐视体育周一凌晨3时直播）

德军喺世盃决赛赢阿根廷后，两年来踢咗19场国际赛，竟然输咗7场，不敌阿根廷、法国同英格兰都话情有可原，欧国外输畀波兰同爱尔兰就有啲讲唔过去，热身赛输埋畀美国同斯洛伐克直情係失礼世界冠军之名添！领队勒夫用人唯亲，漠视喺德甲上位嘅新星，死揽普多斯基、马里奥高美斯呢啲过气契仔唔放，呢个情况两年前世界盃都出现过，球队16强排怪阵就几乎衰喺阿尔及利亚之手，好在到咗重要关头用番啱阵容，之后连过法国、巴西同阿根廷3大难关夺标。今次情况差唔多，佢哋对斯洛伐克又係乱用人，直至最后检阅斗匈牙利终于用番理想阵容轻鬆取胜。

泰摩斯卓克电话报军情

乌克兰阵中嘅37岁名将泰摩斯卓克虽已退居后备，但佢成为咗德军安插喺乌克兰嘅无间道，皆因佢效力拜仁期间同队友感情极好，今次赛前仲经常同德军主力纽亚、汤马士梅拿通电话，勐讚乌克兰中前场点样有料到，今次有信心出线云云。佢仲话德国目前只係寻找最佳状态阶段，今仗对乌克兰肯定难踢，呢番说话自然令德国队上下警惕，今仗绝对唔会轻敌。

乌克兰68岁双闸任你过

乌克兰中场係有亮点，耶莫兰高、高路比恩卡同史堤巴兰高都得到前辈舒夫真高同泰摩斯卓克好评，但呢班波战绩其实甚曳，外围赛小组要屈居斯洛伐克之后排第3，最后靠附加赛险胜斯洛文尼亚出线，水准连欧洲二流都好忟。更何况佢哋防线人才凋零，喺过去一年11场波，37岁老将舒夫卓克不但要场场正选，仲要分别顶左闸、中坚同防中不同位置，皆因根本冇人用，今晚佢踢左闸，同右闸费达斯基加埋已经68岁，对住擅打闪电战嘅德国汤马士梅拿、达斯拿呢对世界级战车，等同任爆任劏，随时连尾灯都望唔到，追都冇得追。