红魔鬼进老摩年代？

“红魔鬼”曼联在足总盃决赛惊涛骇浪下击败水晶宫，今季终于攞返个安慰奖。虽然云戈尔带领球队两年卒可以捧个足总盃，可惜仍未能达到球会基本要求，联赛只能排第五，未能获参与下季欧冠资格，令球会收入大减，呢个足总盃又值得几多？

踢完个足总盃无几耐后，曼联官方宣佈解僱云戈尔。云戈尔亦表示曼联係佢最后执教的一支球会，正式退休。英国媒体再爆料，同曼联传咗一段时间嘅摩连奴下季将会入“魔”，更加先落订四百万镑以防老摩变卦，加盟条件係七千五百万镑五年合约。讲到似层层，似乎摩佬入“魔”已成定局。

老摩能否令红魔鬼皇朝东山再起现在言之过早，但其执教能力根本毋须多疑，最紧要係班球员听教听话。老摩一向有“寸王”之称，讲嘢得罪人多称呼人少，初到英格兰教“车”年代，其实同费爵爷都有过唔少牙齿印。当然，两老都係识英雄重英雄，早已化干戈为玉帛。不过，有传红魔鬼元老之一嘅杰斯将会离队，係咪老摩问题就不得而知。