阿仙奴難扑“鎚”

阿仙奴難扑“鎚”

    踢少一場嘅阿仙奴目前落後榜首李斯特城十一分，奪標有一定困難。不過，雲格講到明“只要仲有一線希望都唔會放棄”，兵工廠餘下賽程的確仲有兩場硬仗要撼，一場作客對曼城，另一場就係今晚倫敦打吡對韋斯咸，但如果今戰再失分的話，應該都可以棄械投降。

    事實上，對住“鎚仔幫”，雖然往績絕對佔優，不過兵工廠今仗實在毫無穩勝把握。皆因韋斯咸今季成為強隊剋星，證明整體實力可以躋身於強隊之中，首循環韋斯咸作客曾以兩球打爆“廠”，今晚主場韋斯咸坐和望贏。初盤阿仙奴讓半球，力爭入前四嘅韋斯咸可以值博。

    韋斯咸雖然在下仗足總盃要與曼聯爭入四強，但爭聯賽第四踢歐冠資格更有“錢”途，相信今戰亦絕不會留有餘地。況且打吡戰一向拼個你死我活，“鎚仔幫”必會全力爭取勝仗。

    阿仙奴不但要保住爭標希望，同時亦要穩守前三位置，球隊當然充滿戰意。近兩戰取得連勝，攻入六球兼零封對手，狀態相當不俗，但硬拼“鎚仔幫”絕對唔易踢。

    推介：和波2:2