阪神打吡飛腳做「大」騷

日職今日爆發一場「阪神打吡」，由神戶勝利船主場迎戰大阪飛腳，呢兩隊波交鋒37次得1次出現0:0嘅悶場，1.8倍入球大絕對抵博。

（有線61、201周六下午3:00直播）

話晒都係地區打吡，為咗面子呢兩隊次次都打甩髀，就攞神戶主場嘅打吡數據為例，佢哋只係得6勝4和8負略處下風，絕對唔係冇得打，最重要係呢組由1999年起做嘅統計顯示，神戶平均每場入到1.67球，不過失球就高達2.28球，淨係呢兩個數加埋已經高過大細2.5球個中位數，冇理由玩嗰個1.9倍入球細啫。

神戶殺手宇佐美貴史Show Time
事實上飛腳開季雖然一如以往咁慢熱，但係呢班波响日職始終有質素優勢，踢順咗就唔係人咁品。特別係前鋒宇佐美貴史素有「神戶殺手」嘅稱號，出道以嚟10戰神戶入咗12球，除非神戶條防線今日突然脫胎換骨，否則好難逃過佢嘅毒手。老實講吖，神戶開咧3場日職就失咗5球，守衞之間嘅互相補位比較差，點可能幾日間變成銅牆鐵壁先？更何況神戶班管理層似乎認為後防冇問題，反而崇尚以攻制攻，前晚宣布羅致廣州恒大棄將雷內，可惜呢個巴西中場仲做緊體檢今日唔出得，神戶嗰套以攻代守嘅大計，暫時冇法子完美實施。

即使係咁，神戶照樣有條件同飛腳對攻，响對手身上攞到入波，事關飛腳後衞吳宰碩傷咗，另一件衞將米倉恒貴左腳亦唔多妥，可能要調今野泰幸踢右閘，防線穩定性或者會打折扣，更加有利今場波開大。