英超阴谋论

英超经已踢过三分二赛程，馀下十二场联赛将会决出今季王者。如无意外，夺标将会係目前排前四位球队之争。

神奇球队李斯特城暂时有两分优势，领先热刺、阿仙奴及曼城，要首夺英超冠军依然荆棘满途。不过，睇返李斯特城馀下赛程又并非绝无机会，除同级对手外，真正豪门只有曼联与车路士，至少比起热刺、阿仙奴及曼城三支竞争对手好踢得多。况且曼联同车仔呢两支所谓强队，今季事实经已废咗武功，就算要做拦路虎，亦未必会阻李斯特城发达，因为又点会益几支长期死对头夺冠畀你威呢？肯定会阿兰嫁阿瑞，累斗累。

阿仙奴的赛程都算“靓仔”，真正硬仗有三场，曼联、热刺及曼城，不过三场都係踢作客，呢三关都未必过得到。

曼城仲有“旧Big4”要对，即係曼联、阿仙奴、车路士及利物浦，四支都係冤家，为啖气都会打餐死。热刺又如何？又係恶战连埸，确要睇球队韧力有几多。

左计右计，“李城”夺标优势的确唔小，最有利係可以专注争夺英超，唔同热刺、阿仙奴与曼城，仲要为欧战而奔波。

足球评述员 Ben