拉科靠神翼博大霧

正副龍門齊缺迎華歷
周二凌晨有場西甲直播賽事，拉科魯尼亞主場迎戰華歷簡奴，拉科翼鋒盧卡斯佩雷斯今季已取得13個聯賽入球，今場對住西甲失波最多嘅華歷簡奴，又係「起筷」好時機，不過拉科正副選龍門齊缺陣，加上近3次對碰全開大盤，今場入球大唔怕追！

（now 632周二凌晨3時30分直播）

27歲嘅盧卡斯佩雷斯喺上周西甲對華倫西亞一戰再取得士哥，若非對手完場前一刻入波逼和，盧卡斯佩雷斯就已經做咗贏波功臣。呢位西班牙籍翼鋒今季13個士哥入面，僅得1球係12碼，證明佢係靠真材實料入波，難怪有傳得到英超豪門阿仙奴睇中。不過拉科令人擔心嘅唔係攻力，而係防守，今場正選門將盧斯停賽，後備門將法比亦因傷缺陣，要靠今季從未喺聯賽披甲嘅曼紐爾把關，防守點都有影響。華歷簡奴踢咗21場西甲，一共失咗45球，平均每場失多過2球，尤其係作客防守極曳，近4場作客失咗17球，今場真係等睇入球騷！

馬里迪莫啞火難讓波
至於法乙比賽，巴黎FC主場對克萊蒙特，巴黎FC中場艾治捷古爾及克萊蒙特中場班頓亞高朗均要坐波監，克萊蒙特近期入得又失得，今仗作客對住巴黎FC保持主動踢法，捧大盤。最後講埋葡超賽事，馬里迪莫主場鬥比蘭倫斯，馬里迪莫近3仗都冇波入，攻力疲弱，加上雙方近3次對賽，比蘭倫斯取得2勝1和，客軍受讓抵玩。