太子女恨踢歐聯 米蘭打吡撐AC

AC米蘭今晚喺意甲對國際米蘭，讓平半都值得捧，因為AC太子女芭芭拉賽前講到明，球會今季用咗1億歐元（約8.4億港元）擴軍，目標係要拎到下屆歐聯參賽資格，相信教練米赫洛域會諗辦法滿足老細嘅願望，國米新簽嘅艾達馬田斯未必做到救世主。

（TVB301台及中央5台周一凌晨3:45直播）

近期AC嘅戰績已經好番好多，佢哋周中喺意大利盃砌低阿歷山迪亞後，近8場有5勝2和1負，不過太子女芭芭拉未滿意，賽前佢落柯打，要求教練米赫洛域拎到下季歐聯參賽席位，除非佢唔想繼續撈，否則今場肯定唔衰得。

國米財困士氣唔慌好
另一方面，國米近排走勢差到暈，周中仲喺意大利盃淨吞祖雲達斯3蛋，消息仲話，現時國米財政狀況好曳，即使將古亞連賣豬仔去中超，都買唔起森多利亞射手艾達馬田斯，只能夠以先借後買形式搵佢幫手，睇怕士氣唔慌好，都係捧AC穩陣啲。