羅馬立立亂遇弱捱細界

意甲首都球隊羅馬換帥之後，未見有起色，仲爆發將帥不和事件，可見會方「翻兜」史巴列堤都係管唔掂班球星。羅馬今輪主場對弱隊費辛隆尼，亦不宜高估。1.15倍主W熱爆冇肉食兼高風險，寧願博2.4倍入球細。

（TVB 301周日凌晨3時45分直播）

羅馬早前炒咗魯迪加西亞後，請回昔日名帥史巴列堤領軍，但幫唔到手，繼主場畀包尾大幡維羅納逼和1比1後，上仗以0比1輸畀祖雲達斯，仲發生中場費奧倫斯不滿被換走，同史帥爭吵事件，軍心更加不穩，加上射手謝雲奴日前離隊去中超搵食，鋒線受削，今場唔好話要大炒費辛隆尼，連入波都有難度。

尾二嘅費辛隆尼近7仗不勝，但上仗守和阿特蘭大0比0，總算有「止血」迹象，佢哋季初對住當時處於勇態嘅羅馬，都只係輸0比2。依家羅馬立立亂，費辛隆尼隨時偷到雞，就算輸都係小負居多。

卡比態勇主W「勒」唔住
早場方面，卡比近期頻頻搶到分，主場已兩連勝，上仗作客更逼和國際米蘭，認真唔嘢小。卡比今仗主場對近4次作客3負嘅巴勒莫，有力全取3分，2.1倍主W值博。

（TVB 301周六晚10時直播）