西悉尼反轉墨城開W

澳職今日上演榜首大戰，「一哥」西悉尼流浪者主場迎戰墨爾本城。西悉尼上場贏波終止3場不勝，後防核心杜普史丹利亦波監刑滿復出，實力夠晒保證。墨爾本城有前冇後嘅踢法娛樂性爆燈，但打硬仗難免蝕底，今場捧1.7倍主勝較划算。

（有線64及203周五下午4:40直播）

馬克布歷治重拾勇態
西悉尼流浪者今季演出穩定，雖然好少大炒對手，但睇番佢哋近12場聯賽有10場入2球或以上，穩定表現係佢哋排榜首嘅主要原因。箭頭馬克布歷治上仗入波重拾射門鞋，連意大利射手比奧華卡利都畀佢逼到長期坐冷板櫈。仲有呀，隊長中堅杜普史丹利今場復出，防守力大大提升，攻守兼備贏埋真係唔奇。

墨城作客遇強即屈
另邊廂嘅墨爾本城目前16場聯賽攻入40球，平均每仗攻入2.5球，不過佢哋失球數字同樣高企，27個失球仲多過尾2嘅紐卡素噴射機！墨爾本城今季3次作客另外2支爭標分子墨爾本勝利同布里斯班獅吼，僅得1和2負劣績，證明對住同級對手玩喪攻冇着數，作客難逃一敗。