法達斯維：卡塔爾U23撲飛大作戰

U23亞洲盃已轉彎入直路，今晚率先上演季軍戰，由東道主卡塔爾U23火併伊拉克U23。你以為季軍戰係例行公事？咁就超錯喇！因為季軍將會直接獲得今夏奧運入場券，卡軍有依家射手榜一哥阿爾丁助陣，攻力強橫，但伊拉克U23亦同樣撻着晒，雙方為搶搭奧運尾班車必定大駁火，入球大乃不二之選。

（now 672周五晚10時45分直播）

摘季可直入里約奧運
由於今屆U23亞洲盃嘅冠、亞、季軍3隊，可代表亞洲出席今夏巴西里約熱內盧奧運，意味住殺入決賽嘅日本U23及南韓U23已穩奪奧運參賽資格，而剩番最後1張入場券，就由今仗卡塔爾U23及伊拉克U23嘅勝方取得，因此呢場季軍戰隨時緊要過決賽。卡塔爾U23今屆藉地利表現突出，至今轟入12球，與決賽雙雄「日韓」並列最強火力，其中王牌阿爾丁更以5個士哥，暫列射手榜一哥，連後衞阿布德爾卡里哈辛亦有4球進帳，阿爾丁都想擸個金靴獎攞番個尾彩，今仗唔會腳軟。

雖然伊拉克U23嘅前鋒冇對家咁標青，但成隊波今屆合共攻入10球，可見佢哋攻擊點眾多，難以防範，雙方為爭奧運入場券，戰意毋須懷疑，鬥攻格局料多波入，大盤有買趁早。