雷法爾 ：冇牙曼城細嚼拖肥

愛華頓專恰阿古路
今晚上演的另一場英聯盃4強次回合比賽，由曼城喺自己地頭，同愛華頓爭奪餘下一席決賽席位。「藍月亮」首回合輸1:2，想晉級呢鋪一定要贏，只不過佢哋近年主場對住「拖肥糖」好少大數到對手，今仗入球中位數去到3.5球，轉捧1.59倍入球細好過。

（TVB301周四凌晨3:45直播）

曼城係就係星味十足，之不過陣中最可靠嘅始終只係得阿古路，雖然領隊比歷連尼否認曼城係阿古路一人球隊，不過上仗咪又係靠呢位阿根廷國腳先可以作客逼和韋斯咸2:2。可以話只要睇實阿古路，曼城火力等同熄咗一半咁滯。咁啱愛華頓就係英超少數對住佢有計嘅球隊，計落曼城對上5次鬥愛華頓，阿古路竟然1粒都入唔到，最叻入波嗰個都冇晒符的話，仲點開得到入球騷先？

阿古路對上5次對賽冇波入
況且愛華頓今仗仲有主力回歸，中堅菲臘積基爾卡復出鎮守中路，增加「藍月亮」士哥難度。事實上，曼城近6次主場對愛華頓，只係得1仗出現多過3個入球，既然「拖肥糖」兩星期前成功悶和曼城0:0，今次再造訪曼城球場，有力照辦煮碗再守多鋪，呢個細盤咪錯過。