阿歷山迪亞開大冇「蘭」度

今晚意大利盃4強首回合上演獨腳戲，阿歷山迪亞與AC米蘭會師都靈奧林匹高球場。阿歷山迪亞今屆意盃曾淘汰兩支甲組球隊，表現一啲都唔曳，撞啱AC米蘭射手卡路士巴卡近期着晒火頻頻入波，兩軍今場隨時合演入球騷，捧1.95倍入球大啱數。

（開賽時間：周三凌晨4:00）

咪睇阿歷山迪亞係丙組仔，就以為今場會任人魚肉，實情佢哋今屆意盃曾經淘汰熱拿亞同巴勒莫兩支意甲球隊，夾埋取得5個入球不特止，兩場波仲要係喺作客情況下先拔頭籌，演出絕對唔失禮，今戰隨時再製造唔少驚喜。

AC卡路士巴卡當弗
再講吖，AC米蘭防線唔多穩陣，近6戰有5場保唔住清白身，埋單失咗7球，之前第4圈意盃主場迎戰乙組仔克羅托內一樣有失波，今場中立場出戰更加冇保證。好在佢哋前線火力夠勁，射手卡路士巴卡自上圈意盃鬥卡比建功後，已經連續3場有斬獲，狀態弗到漏，相信要喺阿歷山迪亞身上搵食唔係難事，入球大值得捧場。