PSG火力全開狙擊巴斯蒂亞

法甲歇冬後重開，頭炮就有榜首嘅巴黎聖日耳門（PSG）主場迎戰巴斯蒂亞。PSG上半季以16勝3和雄霸「一哥」之位，以19分遙遙領先第2位嘅摩納哥，PSG如無意外都可以成就法甲4連霸，不過咁唔代表PSG今場對巴斯蒂亞會放軟手腳，佢哋仲要保住不敗金身，面對作客表現不穩嘅巴斯蒂亞，PSG讓到2球都要捧讓球主勝！

（TVB 302周六凌晨3時30分直播）

最近盛傳PSG睇中史篤城攻擊手阿拿奧杜域，呢位「奧地利伊巴」今季曾先後射死曼城同曼聯，不過科娜就覺得PSG又使乜買佢吖，依家陣中已經粒粒皆星，阿拿奧杜域嚟到咪又係齋坐，難獲上陣機會！

迪馬利亞抖夠搏殺
PSG今場基本上可以夫添出擊，中場柏斯托尼有望趕及傷愈上陣，而上周熱身賽鬥國際米蘭，以及法足盃對華斯基荷兩戰都休息嘅迪馬利亞、卡雲尼同堤亞高施華今場亦可應戰，加埋「戰神」伊巴謙莫域、拿維斯、新鮮出爐嘅法國足球先生馬度迪等球星，PSG只要發揮正常，要贏巴斯蒂亞2球以上又有幾難？

巴斯蒂亞今季聯賽作客未開齋，更一度試過作客5連敗；上場法足盃作客擊敗丙組仔色當根本不可作準。翻查往績巴斯蒂亞近6次對PSG輸足5場，當中有3場係輸3球或以上，今場讓球主勝一於追多鋪。