克叔强硬救“车”

正所谓新官上任三把火，车仔新任教头轩迪克已正式接手球队，并完成上场后第一课操练。首战对屈福特前，“克叔”接受记者访问，讲到明边个球员“hea”踢，又或者搞搞震，想分化球队的话，克叔绝对唔会姑息，话知你係几好波嘅超级球星，一于杀无赦。

老摩因班球员“玩嘢”被迫走，盲嘅都知，克叔又点会傻吓傻吓？既然油王搵得克叔“返头嫁”，又只係教半季，克叔肯定大权在握，绝对唔会揸住鸡毛当令箭。表明做得呢份工，就会全力以赴。正如指责班“车手”一样，收得咁高人工就要交出功课，总之边个球员再搞小动作，冇斗心，欠缺比赛态度的话，一定冇得留低。

克叔一向以强硬见称，打击球队中嘅坏分子绝不手软。之前边几个係滋事分子，克叔亦心中有数，已被列为黑名单，但当然唔会点名抨击。希望几个“蛇头”自动自觉安守本份，千祈唔好令克叔发火，否则非同小可。到底车仔下半季能否重新上路？车迷就要拭目以待。