阿仙奴曼城抢W「大」驳火

冇理由打和益狐狸

随住李斯特城前日作客3:2打败爱华顿，代表阿仙奴同曼城想以英超一哥身份过圣诞无望。做唔成「圣诞冠军」，但係兵工厂今晚主场斗「蓝月亮」，双方都想攞番个亚军补数，兼为嚟紧嘅「圣诞快车」赛期打强心针，何况双方今场打和咪盏益咗「狐狸」，仲边肯留手先？1.72倍入球大值得捧场。

（now621台周二凌晨4:00直播）

阿仙奴踏入12月后全面回勇连胜3场，当中喺欧联分组赛最后一轮赛事更上演绝地反击战，作客大数奥林比亚高斯3:0昂然晋级。射手基奥特摆脱败家仔形象，连续3场士哥合共轰入5球，真係勒都勒唔住，呢铺对住连续7仗失守嘅曼城，随时又再一次骚哥利。

基奥特决战阿古路

讲Fit嘅又点只「银河唯一」1个先，阿仙奴中场大脑奥斯尔同样咁坚。呢位德国中场今季源源不绝为球队提供弹药，斋计英超赛场已经交咗2个入球、13次助攻，惊佢一个双拳难敌四手？唔怕，队友艾朗蓝斯自从重返中场中位置后，随后3战亦交出2入球2助攻，完全有力分担「兵工厂」进攻重责。之不过防中高基连打柴，由活力大不如前嘅法米尼顶替，随时令防线直接受压出错。

咪忘记对手曼城今仗有射手阿古路复出，呢位阿根廷国脚盘射俱佳，係少数具备以一人之力摧毁对方防线嘅顶级锋将。加上中场大衞施华、耶耶托尼愈踢愈好，「蓝月亮」呢匀的确够条件同兵工厂驳火。

曼城冇高柏尼例失波

曼城最弊係中路守将高柏尼继续养伤，佢哋今季缺少呢位铁衞下，15次出击竟然未试过保持到清白身！计落球队对上7仗，无论喺英联盃对住英冠侯城，定还是联赛迎战护紧级嘅史云斯，通通被对手攻破大门，证明防线冇咗高柏尼坚唔掂。既然双方今仗人脚同样攻优于守，今晚交锋仲边使惊有冷场吖！博大啦！