李城弗爆+1嗒糖

近10季聖誕一哥7奪冠軍
雲尼亞里變身「聖誕老人」，率領李斯特城提早派禮物！「狐狸」李斯特城今晚英超只要作客擊敗「拖肥糖」愛華頓，就肯定穩坐榜首歡度聖誕節，仲帶挈英國1個球迷勁中千倍「聖誕冠軍」贏5,000鎊（約6萬港元）。參考過去10季英超聖誕一哥，有7季最終可以捧盃，「狐狸」今仗爭標前哨戰必定搏命，而且有得受讓，當然揀讓球客勝。

（now 624周六晚11時直播）

李斯特城現時分別領先次席阿仙奴2分、第3位曼城3分，加上阿曼將於下周二凌晨對撼，「聖誕冠軍」基本上已成「狐狸」囊中物。日前博彩公司喺社交網上載一張一個李城球迷喺8月開季時買李斯特城成為「聖誕冠軍」嘅彩票，有成1,000倍，換言之佢買5鎊可收5,000鎊過肥年。本港球迷又唔使眼紅，因為過去10季英超聖誕一哥，有7季贏埋冠軍，依家李斯特城捧英超冠軍，賠率仲有11倍，不妨趁早買定。

「神射手」馬列斯抵玩過華Dee
事實上，李斯特城狀態弗到震，上仗贏埋車路士，近9場聯賽取得7勝2和，除咗射手占美華迪繼續入波外，中場馬列斯亦着晒火，近兩仗轟入4球。兩人今季英超合共入咗26球，分別排射手榜第1及第3位。值得一提，有11球進帳嘅馬列斯屬於「英超神射手」投注項目嘅「其他」，有成10倍，比1.8倍嘅華Dee更抵玩。

至於愛華頓前鋒盧卡古亦累積12個入球，但獨力難支，「拖肥糖」近9場英超得2勝，冇本錢讓波。愛華頓上季兩循環對住當時仍處於弱勢嘅李斯特城都贏唔到，更何況「狐狸」依家如日方中，愛華頓更加冇運行。