拜仁“泰”山壓頂

拜仁“泰”山壓頂

    德國盃明晨上演第三圈，班霸拜仁主場對住達斯泰特，由於雙方實力至少相差一班波以上，基本上拜仁就算派出半支後備軍上陣，如無意外拜仁都殺硬對手，入硬八強一席位。

    今季升班嘅達斯泰特目前在德甲排十二位，不過與降班線球隊只有四分之差，仍要為護級而掙扎，對盃賽應該冇乜要求，何況今次仲要對住頂班嘅拜仁，不如早啲疊埋心水保住德甲位置，就算要同拜仁搏，相信亦無能為力。初盤拜仁慕尼黑讓兩球半 / 三球，聯賽首循環拜仁作客都淨勝三球，今仗主場料必贏“特”。

    拜仁在德甲九仗主場全勝，攻入卅二球只失三球，平均每場攻入三球以上，火力勁到爆，相信今仗又係射手利雲度斯基及湯馬士梅拿嘅表演時間。以達斯泰特人腳，根本難以與拜仁抗衡，聯賽首循環被拜仁打到全無還擊之力，今場作客安聯球場更加冇運行，何況上仗聯賽亦慘吞哈化柏林四蛋，防線完全崩潰，士氣亦全面受挫，今仗又要對住超強橫嘅拜仁，達斯泰特等被劏。

    推介：拜仁慕尼黑4:0