高普率紅軍 圍攻聖人

登陸英超遭朗奴高文潑冷水
高普兩個月前強勢入主利物浦引發熱潮，但係修咸頓領隊朗奴高文就睇唔過眼，指摘傳媒過分吹捧對方，仲趁住對手陣腳未穩喺晏菲路球場偷雞搶分。正所謂君子報仇、十年未晚，呢次高普帶領成功改造嘅利物浦，喺英聯盃8強造訪「聖人」修咸頓，梗係要騷哥利證明自己唔係浪得虛名啦，平手盤一於撐紅軍！

（TVB301周四凌晨3:45直播）

高普過去帶領多蒙特成績有目共睹，佢喺10月中執掌紅軍教鞭自然引起關注，唔少球迷認為紅軍中興有望之餘，球會甚至趁機推出呢位新帥嘅周邊商品搵番筆，足見佢人氣爆燈。面對媒體當時一面倒唱好，朗奴高文偏偏潑冷水，話對高普嘅造勢新聞感煩厭，仲警告對方英超唔易踢添。之後雙方喺10月底聯賽交手，「聖人」憑住紅軍未夾好，完場前士哥追和搶走1分，搞到高普未能提前打開勝利之門，今晚兩軍相遇，呢位德國領隊仲唔還以顏色咩！

史獨前途響警號必搏
高普入主紅軍後，最大得益肯定係盧卡斯，呢位中場悍將喺高普手下重獲新生，佢喺今季搶截數據更一度高踞歐洲第二，完全啱晒高普嘅逼搶戰術。盧卡斯今場坐完波監復出，勢令紅軍中場掃蕩能力大增，聖人想射番次波都唔容易。

再講吖，中場核心菲臘比古天奴有望趕及傷愈落場搏殺外，紅軍更迎來射手史杜列治回歸，呢名箭頭今季傷多過踢，前途已經響起警號，早前分別被主帥高普同名宿加歷查點名批評。若然「史獨」再冇貨交怕且有排要坐冷板櫈，今戰上陣肯定會加多兩錢肉緊數胡啫。

修咸頓路數被睇通晒
雖然修咸頓近年進步神速，偏偏就係對住利物浦冇晒辦法，近4次交手錄得1和3負劣績。冇計啦，拉爾拉拿、洛夫雲同尼達利基尼呢班前聖人主力陸續過檔紅軍，球隊有乜路數都畀利物浦睇通晒，仲邊有得踢先？加上佢哋最近連輸2仗氣勢回落，呢次面對來勢洶洶矢志復仇嘅利物浦，聖人仲邊有得走？