曼城打老虎見好即收

英格蘭聯賽盃八強今晚上演「雙城戰」，曼城主場對侯城。曼城剛重奪英超榜首，但亦付出沉重代價，射手阿古路又傷需要抖十日，今場唔使預佢，其他主力近期征戰頻密亦開始有疲態。由於今仗對手只係「老虎仔」侯城，領隊比歷連尼應會輪換球員，畀主將抖抖氣。侯城礙於質素所限，預料會「泊大巴」死守，揀入球細。

（TVB 301周三凌晨3時45分直播）

輪換上陣免添傷兵
曼城近況麻麻，聯賽被維拉守和後，跟住慘敗喺利物浦腳下，歐聯亦輸畀祖記。直至上仗英超先至贏番場，但阿古路卻傷出，加上門將赫特、後衞薩巴列達、高柏尼養傷，曼城傷兵問題有惡化趨勢。因此今仗踢盃仔遇上低一級對手，相信領隊比歷連尼唔會要求球員搏得太盡，以免再出現傷兵，小勝已收貨。

至於侯城雖然排英冠前列，但實力始終同曼城有一大段距離，加上狀態走下坡近兩仗都贏唔到，今場想入波都難。事實上，侯城今屆英聯盃踢法保守，之前四圈全部開細，每場法定時間內只入兩球兼不失，包括上圈同李斯特城踢足百二分鐘仍然打和，最終憑互射12碼晉級。證明「泊大巴」戰術奏效之下，侯城今仗再鬥英超球隊應會再施「守」術博太霧。