水晶宮孖寶施魔法 玩殘頹爆黑貓

「兵不知將，將不知兵」可謂兵家大忌，入主超過個半月嘅新特蘭主帥艾拿戴斯，竟然仲未搞得清成隊波心目中嘅最佳11人，更何況「黑貓」作客成績係今季英超最差，水晶宮攻擊孖寶─韋菲特沙夏、卡比耶仲唔乘機施展魔法困住班頹爆「黑貓」戰將咩？一於撐回勇嘅火熱水晶宮，讓半一捧1.71倍上盤。

（now621台周二凌晨4:00直播）

唔少新帥上任後都會有段蜜月期，不過新特蘭領隊艾拿戴斯就冇咁嘅福氣。雖然佢老人家曾領軍喺「東北打吡」殺退死敵紐卡素，不過對住西布朗、愛華頓同修咸頓全部敗陣而回，當中輸畀拖肥糖一役更係2:6慘敗，計落「黑貓」表現的確冇乜起色。

新特蘭艾拿戴斯仲未搞清最佳11人
好喇，依家艾帥假假哋都叫同球隊磨合咗個半月，怕且都係時候畀啲真功夫大家睇。點知呢位老人家夠膽死話，到家吓都未搞清楚班波最佳11人：「我當初上任嗰陣，球隊分別有2件球員停賽、3個球員受傷，踢完紐卡素同愛華頓又傷幾件，之後就輪到國際賽檔期，搞到我家陣都仲搵緊球隊最強11人！」聽完真係畀佢吹到啤一聲！咁搞法叫人邊夠膽撐「黑貓」呀？

再講吖，新特蘭作客成績慘不忍睹，跨季15場作客先僅贏1場。若然齋計今季聯賽就仲得人驚，錄得1和5負不勝戰績，成為唯一一支未喺客場開齋嘅英超球隊，場均失球仲高達3粒咁多，呢鋪仲可以憑乜搶分先？

上仗贏紅軍士氣大振
另邊廂嘅水晶宮狀態回升，佢哋上仗作客2:1殺敗如日中天嘅利物浦，中止4仗不勝走勢，振奮士氣。更何況一對中場卡比耶、韋菲特沙夏呢對攻擊孖寶等戰將全部都會落場搏殺，有權喺防線不設防嘅新特蘭爭取士哥，搵番射門鞋，睇怕全取3分都唔難咯。