ＱＰＲ訪米堡 再追半場和

英冠獨腳戲有大戰上演，米杜士堡主場硬撼昆士柏流浪（QPR），睇番兩隊今季表現，今場梗係排緊第4嘅「米堡」秤先，但QPR對賽往績佔優，對上4次交手皆能擊敗米堡，預料今場米堡唔易踢，QPR近7場皆開出半場和，一於再追！

（TVB 301周六凌晨3時45分直播）

QPR今季由英超降到英冠，成績每況愈下，16場聯賽後僅得20分，排喺13位，球會今個月初嘗試挽救球隊頹勢，怒炒領隊基斯藍斯，並委任禾諾克做看守領隊，有傳禾諾克將會繼續任教QPR至今個月尾。

禾諾克首戰只能喺主場同普雷斯頓悶和0比0，連埋之前兩場，QPR已經連續3場冇波入，攻力疲弱，皆因為球隊射入6個聯賽入球嘅王牌射手查理柯士甸最近先傷愈復出，狀態麻麻，另一前鋒占美麥基則要長抖。QPR連續7場開半場和，其中最近5仗嘅半場都係打和0比0，球隊防守已經改善，係攻力需要加強。

米堡往績輸蝕先求穩守
米堡毫無疑問係地頭蟲，喺英冠取得3連勝後，上場作客侯城突然被大炒3蛋，球隊一返到主場出戰就發揮正常，近5仗主場錄得4勝1和，而且一球不失。不過咁唔代表QPR今場冇得打，球隊近4次對米堡贏晒，包括兩場作客，心理上佔優。米堡守強於攻，半場應會謀足而後動，半場和值得一博。