獅吼主場硬淨恰慣墨城

今日澳職獨腳戲，布里斯班獅吼主場迎戰墨爾本城，獅吼今季成績出色，皆因主場搶分成功率達百分百，主場3戰全勝，水準可靠。至於墨爾本城踢法有前冇後，表現非常飄忽，遇上穩紮穩打嘅獅吼，肯定輸蝕。布里斯班獅吼主W有1.85倍，值得一試。

（有線64及203台周五下午5時直播）

布里斯班獅吼今季表現大為改善，開季後一直位居積分榜前2位置，好大程度上因為增兵見效，新加盟嘅前鋒占美麥卡倫，迅速融入球隊，已有3球進帳。加上20歲小將班頓波里路演出令人驚喜，佢今季4個入球，全部都係主場射入，成為球隊主場全勝嘅大功臣。今仗面對防線脆弱嘅墨爾本城，相信兩人將有大把表演機會。

墨爾本城防線勁曳
墨爾本城踢6場聯賽入12球，失13球，的確好有娛樂性，但成績就麻麻，僅2勝1和3負，上仗主場更慘吞西悉尼流浪者3蛋，球員難免洩氣。墨爾本城過去4次作客獅吼，亦輸咗3次，種種因素都顯示墨爾本城今仗冇運行。

競賽會惡陀地收學費
2015/11/20

喺其他聯賽進行得如火如荼之際，阿根廷甲組聯賽常規賽已經打完，依家打緊附加賽，其中阿King睇中聽朝競賽會主場迎戰學生隊，雙方為爭奪下年自由盃入場券必定打甩髀，不過競賽會喺常規賽主場成績冠絕阿甲，必藉地利搞掂學生隊，小讓平半不容錯過。

（周六早上8時30分）

查實阿甲常規賽於國際賽期前已經結束，小保加榮膺冠軍，依家進行爭逐自由盃及南球盃資格嘅附加賽，今仗競賽會對學生隊，乃一場過決勝負嘅爭自由盃入場券4強戰，雙方為殺入決賽冇得保留，但咁樣嘅賽制，對競賽會非常有利。因為有前國米箭頭「大米」迪亞高米列圖壓陣嘅競賽會，每逢主場出擊都特別醒神，今季常規賽喺自己地頭取得13勝1和1負嘅佳績，連冠軍小保加都要企埋一邊，排阿甲主場成績嘅「冧巴溫」，撞正學生隊有主力前鋒盧卡斯洛迪古斯因傷上陣成疑，仲唔趁機踩多兩腳咩？近五仗主場全勝嘅競賽會小讓平半，呢個上盤非常值博。

至於德乙波琴主場對柏林聯，波琴尖刀泰路迪近三場聯賽入兩球，柏林聯射手史克薛斯基更連續兩場有士哥，預計今仗會合演入球騷，大盤好路。

伊高斯遇弱又起筷
最後荷乙奧斯主場對伊高斯，奧斯連續四場聯賽不勝，最弊係初段勁唔集中，有三次半場已落後，「一哥」伊高斯主力雲伊韋積雖有傷在身，但可能紮住上陣，奧斯難有運行，客W有計。