愛爾蘭上盤睇定食

波斯尼亞受困附加賽魔咒
附加賽對唔少球隊嚟講，可以話係最後一條參加大賽嘅救命草，不過波斯尼亞就唔係咁睇喇。事關佢哋史上2次踢附加賽，最終都係出局而回，所以話附加賽對佢哋嚟講簡直同魔咒冇乜分別。今晚波軍帶住主場打和1:1嘅劣勢，作客愛爾蘭出戰歐國盃附加賽次回合賽事，睇怕都係逃唔過宿命，就算受讓平半都係捧2.08倍上盤好過。

（有線61、64、201及203台、中央5台周二凌晨3:45直播）

波斯尼亞由1995年起獨立參賽，自此致力參與國際大型比賽。上年佢哋出現「零的突破」，首度打入世界盃決賽周，不過球隊喺歐國盃仍然係一片空白。其實原本佢哋喺上屆係有機會殺入決賽周，可惜喺附加賽被葡萄牙以6:2殺敗，連同2010年喺世盃附加賽出局，波斯尼亞2次參加附加賽都冇好結果。

客軍近5場附加賽不勝
嚟到上仗首回合比賽，球隊既坐擁主場之利，對手攻守兩瓣亦有主力球員停賽，諗住可以先下一城啦，偏偏又被濃霧影響發揮，結果只能同愛爾蘭打和1:1，計落佢哋已經連續5場附加賽都未贏過，都咪話唔邪！

雖然主力射手迪斯高狀態大勇，今年總計共為國家隊攻入7球，佔咗波斯尼亞喺今屆賽事超過一半入球。可惜其他隊友唔多爭氣，好似拍檔伊比斯域成年只為國家隊入得1粒，換言之一旦迪斯高被人睇實，隊波即時被廢去一半武功，今仗想爭取入球反壓對手出線，自然更加難咯。

主隊兩重心停滿復出
況且愛爾蘭主場表現非常硬淨，連續8場主場未輸過之餘，就連世盃盟主德國喺分組賽嚟到都要輸波而回，班波明顯喺自己地頭比賽踢高一班。況且前鋒約拿芬禾達斯、後衞奧沙已經坐完波監，今仗齊齊復出搏殺，就更有力頂住波斯尼亞。咪忘記愛軍仲揸住粒作客入球，形勢上一啲都唔需要心急，大有條件等到對方犯錯先攞佢命囉。