等足30年匈牙利細不可擋

歐國盃外圍賽附加賽次回合，匈牙利主場迎戰挪威，究竟匈牙利可唔可以相隔30年後再次殺入大賽決賽周，就睇呢鋪！匈牙利喺首回合憑將士用命，作客死守1比0至完場，拎住1個作客入球優勢返到主場。為咗繼1986年世界盃後再次進身國際賽決賽周，匈牙利今場即使畀人話龜縮，都要保住個優勢，挪威攻力唔強，細盤要捧呀！

（有線61及201台周一凌晨3時45分直播）

附加賽首回合前，挪威超過30年未輸過畀匈牙利，結果上場就證明咗紀錄係攞嚟破嘅。既然可以打破宿命，就自然有望相隔30年再次殺入大賽決賽周，而匈牙利對上一次出戰歐國盃決賽周，更要數到44年前，所以你話今場對佢哋係幾重要。

匈牙利上場開波26分鐘就憑住首次代表國家隊上陣嘅21歲中場基連希斯拿攻入關鍵一球，餘下64分鐘全軍死守頂住對手嘅攻勢，加上第100次為國家隊上陣嘅39歲「睡褲門神」基拿利多次作出撲救，成功力保不失。作客都頂到唔失波，主場就更有把握唔畀挪威攞到作客入球。

挪威埋門一腳把握曳
挪威一對箭頭蘇達倫、馬古斯柏達臣喺所屬球會頻頻入波，但嚟到國家隊就總係未能擦出火花，28歲嘅蘇達倫有24頂國家隊喼帽，但咁耐以嚟只係取得1個國家隊入波，而拍檔馬古斯柏達臣亦係得1個入球，證明佢兩個真係靠唔住。挪威上場有成22次攻門，但都攻唔入，今場作客想攻睇怕都係有心無力，捧細盤喇！