拜仁掀起「大」風暴

球星下戰書 盡數兵工廠
拜仁慕尼黑今季開局順風順水，一度取得12連勝，點知呢支德甲王者喺上輪歐聯分組賽，慘被阿仙奴中斷紀錄，作客以0:2敗走酋長球場。呢啖氣成班拜仁戰將都啃唔落，佢哋今晚回師安聯球場再鬥F組仇家阿仙奴，為咗報仇雪恨，勢必瘋狂搶攻掀起一場「大」風暴，1.5倍入球大熱都要捧。

（有線61、201及中央5台周四凌晨3:45直播）

自從上個月中敗走倫敦後，一眾拜仁球員都對此耿耿於懷，誓要喺今晚數胡復仇咁話。賽前先有中場維達爾透過德國《圖片報》宣戰，揚言今仗會畀阿仙奴見識到「一支真正嘅拜仁」，連隊長拿姆亦唔客氣，講明要喺今晚證明佢哋先係實力更強嗰一隊。家陣球隊上下瀰漫住復仇情緒，相信呢鋪拜仁唔止要贏，仲要大數對手一吐烏氣。

安聯7戰狂轟29球
事實上，拜仁鋒力有幾癲真係唔使多講，呢班波今季7次主場出擊，其中6戰攻入對手至少3粒，夾埋斬獲29球，隨時靠自己都夠開大盤。更何況上次交手佢哋唔係冇「餐士」，只係因為對手門將施治上晒身先無功而還。今仗佢哋有埋翼鋒洛賓復出，配合話勁恨打破2仗入球荒嘅射手羅拔利雲度夫斯基、快翼杜格拉斯哥斯達等人全方位開火，足夠攻陷兵工廠大門有凸。

基奧特近5仗省4粒
另邊廂阿仙奴亦要為搶分而戰，雖然鋒將禾確特、阿歷士張伯倫最近加入咗傷兵行列，好在前鋒基奧特同中場奧斯爾狀態大勇，前者近5仗攻入4球，後者就仲誇張，聯賽交出9次助攻，追平咗上季嘅助攻數字，加埋能傳善射嘅阿歷斯山齊士幫手，兵工廠點肯坐以待斃先？

再講吖，阿仙奴多年嚟都堅持進攻風格，加上2年前佢哋亦試過喺安聯球場砌低拜仁，怕且主帥雲格唔甘於死守博攞1分走。相信今仗只要喺早段打開紀錄，之後入球就會源源不絕咁出現，一場大騷怕且都走唔甩咯。