阿King今日睇中場法甲補賽尼斯主場迎戰南特，前者火力勁到冇朋友，上仗意外被里爾悶和谷埋成肚火，誓要搵南特發洩，但佢哋防線又唔穩，捧入球大。 （周四凌晨1時30分開賽，馬會網上文字直播） 呢場波係上月頭舉行，當時雙方半場打成2比2，非常刺激，點知受大雨及雷電影響，搞到場地嚴重積水不宜比賽，球證惟有宣布腰斬，論形勢尼斯佔盡上風，未能繼續比賽認真唔抵。 入球數字僅次PSG 尼斯今季以賓艾化、謝明、賓華馬為首嘅鋒線攻力強橫，至今合共轟入25球，僅次於聖日耳門（PSG）為法甲第二強火力，而賓艾化亦以7球位居射手榜次席，呢班波崇尚性感足球，造成入波及失波數字都高，上仗竟被里爾悶和0比0打窒道氣，預計今仗會喪攻南特博反彈，大盤有2.2倍值博。