衞冕嘅巴塞隆拿現時喺E組以7分排榜首一枝獨秀，只要今晚主場擊敗白俄羅斯巴迪，另一邊廂嘅羅馬失分的話，巴塞即可提早進身16強。不過巴塞日前收到壞消息，王牌美斯傷勢比預期嚴重，估計趕唔切喺月中嘅國家打吡復出鬥皇馬，換句話講嚟緊佢哋都要靠尼馬、蘇亞雷斯食胡。本周末佢哋喺西甲將要硬撼實力不俗嘅維拉利爾，隨時留有一手。上輪分組賽巴塞都係以2比0「小勝」巴迪，今仗中位數為3.5球，寧捧細盤。 （有線63台周四凌晨3時45分直播） 羅馬利華大駁火 另一場羅馬主場鬥利華古遜，羅馬今仗續有隊長托迪倦勤，不過佢哋現時只得2分排包尾，想出線要焗攻。利華古遜箭頭查維亞靴南迪斯重拾佳態，作客唔赦對手，兩軍上輪合演入球騷打和4比4，今仗再追大盤啱數。 （有線62及202台周四凌晨3時45分直播）