藍戰車失控無力爆基

「I have nothing to say」，見到今季車路士頹成咁，連平時寸寸貢嘅莫連奴都無話可說，就知呢架「車」已經唔輪到「寸王」去控制。雖然車仔球員同莫連奴都向外界強調球隊好團結，軍心並冇不穩，不過「真的假不了，假的真不了」，今場喺歐聯G組主場對基輔戴拿模，話就話係「寸王」續命戰，但班球員睇怕想佢落鑊多啲，車仔今場讓半一，梗係捧基輔下盤！

（有線64及203台周四凌晨3時45分直播）

車仔上場英超遭利物浦反勝3比1，近8場錄得1勝3和4負，當中包括喺歐聯不敵波圖1比2，同埋作客悶和基輔戴拿模0比0，成績慘不忍睹。聯賽輸畀利物浦之後，已盛傳莫連奴喺車仔嘅時間進入倒數階段，今場對基輔再唔贏，睇嚟「寸王」都食硬豉椒炒魷。

車手作反 基輔有雞偷
雖然迪亞高哥斯達、韋利安、拉美利斯、約翰米基爾等人都先後出言力撐莫連奴，「寸王」亦話球隊上下團結一致，但隊波士氣低落係事實。最近又傳出隊中有球員唔妥「寸王」，英國BBC節目主持人爆料，指有一名車仔球員表明「寧願輸波都唔想莫連奴贏波」，嫌疑犯更直指近排交出「神級零表現」、全場波踢到隱晒形嘅夏薩特。另一個傳聞係法比加斯帶頭起義反「寸王」，主因係不滿其管治方式；正所謂空穴來風未必無因，球員喺場上嘅表現係呃唔到人，你話車仔依家上下一心為保住莫連奴嘅帥位而戰，冇人會信囉！

基輔戴拿模喺G組以5分排緊第2位，比車仔多1分，今場作客最緊要保住不敗，將出線主動權掌握喺手，呢隊波踢法硬淨，近3仗一球不失，今場受讓要捧！