摩納哥不設防益里昂

法甲周六凌晨獨腳戲，兩大豪門對決，由摩納哥主場迎戰里昂。兩軍今季開季表現遠遜預期，摩納哥後防表現甩漏勁多，而且上季3次交手都未贏過里昂，主場出擊都唔好高估，今場捧讓球客勝。

（TVB 302周六凌晨2時30分直播）

兩軍季前都被視為係巴黎聖日耳門今季爭標最大敵人，不過經過9輪聯賽後，兩隊排名前五不入，成績令人失望。今仗主場出擊嘅摩納哥連盃賽在內對上6場都有失波，就算面對實力一般嘅甘岡、蒙彼利埃及羅連安特合共失8球，防線嚴重不穩。

拿卡錫迪抖足數胡
里昂方面就要面對攻力不足嘅隱憂，中場費基亞受傷長抖，前線要靠上季法甲最佳球員拿卡錫迪單天保至尊。拿卡錫迪喺國際賽前成功打破入球荒，助里昂擊敗蘭斯，對上兩場國家隊比賽亦只係後備上陣，體力冇咩消耗下今場有力喺摩納哥搵到甜頭。

摩納哥對上6場比賽有5次先失波兼上半場落後，今場除咗捧讓球客勝，半場客勝或里昂第一隊入球亦值得一試。