迪安冇「射手中坚」撑杜亚斯

过咗寻日超级星期日连场大战后，今日变得静英英，得4场波玩，不过仲好啦，可以摆多啲时间认真研究呢几场波，玩吓过关3串1。阿King睇中法乙嘅杜亚斯主场对战迪安，榜首嘅迪安虽然喺联赛6连胜，但佢哋今场有中路守将基斯杜化祖利安停赛，防线或受影响，而且球队过去四次作客杜亚斯未赢过，杜亚斯受让捧得过喎！
（周二凌晨2时30分开赛）
杜亚斯喺联赛榜排紧14，近4场又得两负两和，其中两场输波都喺主场出战，咁嘅状态，对住联赛6连胜嘅「一哥」迪安，迪安赢波仲唔係「易丝执」？不过睇番足智彩赔率，客胜仅得2.3倍，睇嚟真係有暗涌喎。迪安今场最大嘅暗涌就係有中坚基斯杜化祖利安坐波监，冇咗佢唔单止防守受削，连攻力都有影响。真係讲你都唔信，呢位后防中流砥柱正以5个入球成为队中神射手，全因佢制空力超强，成日把握死球入波。冇咗呢位大将，迪安真係冇必胜把握。加上迪安嘅对赛往绩亦唔好，近4次作客杜亚斯仅得两和两负，所以今场搵受让嘅杜亚斯做过关胆稳阵呀！
杜堡柏达邦捱「细」界
至于德乙就有杜伊斯堡主场对柏达邦，今场真係海军斗水兵，两队状态都低迷，「杜堡」今季9场联赛未赢过，柏达邦则攻力疲弱，近3作客全败之馀更一球不入，今场宁愿拣入球细。最后就係阿甲班菲特主场迎战竞赛会，竞赛会近4仗赢咗3场，状态甚勇，加上近3次作客班菲特全胜，今场平手盘一于要竞赛会！