迪安冇「射手中堅」撐杜亞斯

過咗尋日超級星期日連場大戰後，今日變得靜英英，得4場波玩，不過仲好啦，可以擺多啲時間認真研究呢幾場波，玩吓過關3串1。阿King睇中法乙嘅杜亞斯主場對戰迪安，榜首嘅迪安雖然喺聯賽6連勝，但佢哋今場有中路守將基斯杜化祖利安停賽，防線或受影響，而且球隊過去四次作客杜亞斯未贏過，杜亞斯受讓捧得過喎！

（周二凌晨2時30分開賽）

杜亞斯喺聯賽榜排緊14，近4場又得兩負兩和，其中兩場輸波都喺主場出戰，咁嘅狀態，對住聯賽6連勝嘅「一哥」迪安，迪安贏波仲唔係「易絲執」？不過睇番足智彩賠率，客勝僅得2.3倍，睇嚟真係有暗湧喎。迪安今場最大嘅暗湧就係有中堅基斯杜化祖利安坐波監，冇咗佢唔單止防守受削，連攻力都有影響。真係講你都唔信，呢位後防中流砥柱正以5個入球成為隊中神射手，全因佢制空力超強，成日把握死球入波。冇咗呢位大將，迪安真係冇必勝把握。加上迪安嘅對賽往績亦唔好，近4次作客杜亞斯僅得兩和兩負，所以今場搵受讓嘅杜亞斯做過關膽穩陣呀！

杜堡柏達邦捱「細」界
至於德乙就有杜伊斯堡主場對柏達邦，今場真係海軍鬥水兵，兩隊狀態都低迷，「杜堡」今季9場聯賽未贏過，柏達邦則攻力疲弱，近3作客全敗之餘更一球不入，今場寧願揀入球細。最後就係阿甲班菲特主場迎戰競賽會，競賽會近4仗贏咗3場，狀態甚勇，加上近3次作客班菲特全勝，今場平手盤一於要競賽會！