拜仁冇得“禾”

拜仁冇得“禾”

德甲周中加開快車兼上演強者對話，上季聯賽冠、亞軍嘅拜仁慕尼黑火拼禾夫斯堡。拜仁近十五次主場對住禾夫斯堡贏足十五場，安聯球場似乎係禾夫斯堡葬身之地，而拜仁今季開鑼五場聯賽加一場歐冠盃，六戰全勝攻入十八球只失兩球，狀態“弗”到得人驚。禾夫斯堡今季兩場作客只能和氣收場，且對手都係下游球隊，計各項數據，“狼堡”今仗凶多吉少，初盤拜仁讓一球/球半，勢不可擋嘅拜仁料可殺破“狼”。

拜仁目前有洛賓與列比利兩大攻擊手因傷缺陣，但對球隊整體進攻體系冇太大影響，利雲度斯基、湯馬士梅拿、葛斯及新加盟嘅維達爾一樣殺傷力十足，板凳深度絕對不成問題。對手雖然係上季“阿二”，但拜仁始終在德甲超班，“狼堡”仍未有足夠實力挑戰拜仁地位。

“狼堡”上季勇奪德甲亞軍，迪布尼可謂功不可沒，惜今季轉投曼城，另一中場大將比列錫亦已離隊，中場創造力大打折扣，雖則引入多名強援補充戰力，但暫時效果一般，講合作性明顯不及拜仁，想守和一分都難。

推介：拜仁慕尼黑  三比〇