門神膝傷缺陣車仔大鑊

今晚英超早場上演愛華頓主場鬥車路士，藍戰士賽前傳噩耗，比利時門神泰拔高圖爾斯因膝傷有可能要抖兩個月，令開季演出嚴重不穩嘅防線雪上加霜。愛華頓前線盧卡古、干尼、巴克里都有破關能力，今場捧大盤。

（now 621周六晚7時45分直播）

車路士上季三十八場聯賽只失三十二球，但今季頭四輪合共已失九球，佔上季失球數字四分之一，穩健程度大不如前。當中守將泰利、伊雲洛域、加利卡希爾速度慢成彈劾對象，最慘係首席門將泰拔高圖爾斯周中操練時弄傷膝部，有機會要休息兩個月，就算副選比高域都有質素，但默契肯定打折扣。

愛華頓主場求開齋鬥攻
今場另一焦點係主隊中堅史東斯，車仔今夏一直想買呢名英格蘭國腳，最終未能成事，結果換來名不經傳嘅南特中堅迪積洛保積及奧格斯堡左閘艾度巴巴，兩人初來甫到，能否適應英超節奏屬未知數，要佢哋即時幫到防線無疑要求過高。

愛華頓今季兩次主場出擊一和一負未開齋，求勝決心唔使懷疑，今仗雖有中場湯卡華利因傷缺陣，但盧卡古、巴克里、干尼季初夾得唔錯，有力喺積弱嘅車仔防線身上搵着數。上季車仔作客葛迪遜公園球場曾經大勝6比3，今次隨時又再上演入球騷。