衞冕飛腳大舉出擊

進攻孖寶同鯨魚駁火
日本聯賽盃八強首回合今日開波，重頭戲當然係上屆冠軍大阪飛腳主場迎戰名古屋鯨魚！雙方以往碰面經常合演入球騷，以中位數2.5球計，近十四次對賽，有十三次開大。鯨魚今屆日聯盃三場作客亦全部開大，水準可靠，一於再追大盤。 （有線61及201台周三晚6時直播）

大阪飛腳隊如其名，一向旺開大，今季日職第二階段，九場聯賽有六場開入球大，皆因球隊擁有遠藤保仁、安達臣柏德列、宇佐美貴史等進攻好手，三人第二階段聯賽已轟入十一球，雖然宇佐美貴史入選日本隊缺陣，但前兩者咁弗都夠殺喇。飛腳身負衞冕重任，爭勝戰意肯定高，特別是首回合主場出擊，更要把握地利優勢贏多幾球，奠定晉級基礎。

鯨魚入得又失得
名古屋鯨魚攻強守弱，第二階段前九場聯賽，共入十四球亦失咗十五球，上仗以2比5不敵廣島三箭，爆出總入球「7+」，認真誇張。鯨魚踢日聯盃同樣有前冇後，分組賽六戰五次開大，其中三場作客都開大，包括贏川崎前鋒3比1，打和山形山神3比3，反勝清水心跳2比1，可見鯨魚作客踢法一樣進取，開入球大機會樂觀。