曼城扑“鎚”

曼城扑“鎚”

曼市雙雄日前齊齊在足總盃失威，都希望在聯賽盃四強重振聲威。曼城今晚在四強首回合於無敵的主場出擊，領隊柏歷連尼已講明任何錦標都唔會放過，剛剛在足總盃出局的韋斯咸肯定冇運行。為免夜長夢多，曼城必盡數爭優勢，首回合勝券在握。

曼城的跨年連勝在足總盃第三圈被打窒，作客英冠布力般失威僅被逼和，搞到重賽兼要取消去中東友賽掘金的行程。見財化水一肚氣，今晚轉戰聯賽盃四強，肯定要搵韋斯咸出氣。

無敵主場火力勁

曼城仍然有阿古路缺陣，但傷兵問題唔算嚴重，祖維迪等人亦快將復出，陣中仲有迪施高、尼格度、拿華斯及拿斯尼等殺手。更重是曼城今季的主場無敵，本土賽事十一戰全勝攻入恐怖的四十三球僅失六球，阿仙奴、熱刺及曼聯都被炒起，且已保持十四場不敗，狀態及士氣齊備，“鎚仔幫”韋斯咸到訪真係以卵擊石。另一重點是曼城在踢完次回合就要在歐冠盃硬撼巴塞，屆時肯定要留力，首回合必定數得就數，以免再留後患。領隊柏歷連尼直言要贏盡所有錦標：“我們參加每項賽事，都視為同等重要，因我們的目標是贏盡所有。”

韋斯咸剛被大炒

韋斯咸的狀態認真差，英超排尾二為護級掙扎，足總盃剛吞英冠的諾定咸森林五蛋，近五場不敗輸四場，防線漏水共失十六球。陣中又有哥連尼、列特及盧保等傷兵，儘管上一圈爆冷淘汰熱刺，但奇蹟可一不可再，首回合極度兇險。

老闆公開撐艾帥

士氣低迷，好消息是領隊艾拉迪斯獲老闆蘇利雲及高特公開力撐：“我們知道艾拉迪斯仍未失去其野心，在只有十四個一線球員可用下，要在六日內打三場硬仗幾乎是不可能的任務。但我們亦有過類似經驗，大家需要攜手共度難關。”

韋斯咸宣佈從狼隊借得後衛羅渣莊臣，紓緩傷兵問題解燃眉之急。