世界盃2026：踢法充滿侵略性摩洛哥首入蘇Quali_星島日報

世盃C組第2輪賽事，由蘇格蘭同摩洛哥對撼！蘇格蘭首仗旗開得勝，不過佢哋對住同組最弱嘅海地僅勝1比0，無論表現或比數都遠差預期；相反摩洛哥上場被巴西逼和，但係展現出超強侵略性，進攻速度同銳利度有力撕破蘇格蘭防線，客隊第一隊入球係理想選擇。（Now 618及616周六早上6時直播）文:工廠仔

非洲雄獅摩洛哥上場對住巴西，表現更勝該支5屆冠軍，沙巴利同巴謙戴亞斯為首嘅進攻，單對單爆破、細膩組織同致命傳送都有齊。18歲中場保亞迪大範圍掃蕩令摩洛哥經常可以反守為攻，最重要係球隊踢法好肯進攻，比賽中經常向前傳送同突破，殺對方措手不及。睇番摩洛哥最近5場比賽，全部都係先開紀錄嘅一隊，證明佢哋高速搶攻踢法唔係咁多對手跟得上。

蘇格蘭防線粗枝大葉
蘇格蘭一向都係守強於攻，上場對海地基本上踢成均勢，而且前場入球能力比較薄弱，入波都係靠中場球星麥湯米尼及約翰麥甘尼，對住狀態巔峰嘅摩洛哥，隨時會陷入捱打劣勢。蘇格蘭後防靠體能同硬朗打法，但對住速度同技術好嘅前鋒，容易被搵到缺口一擊即破，預計今場頂唔住摩洛哥搶攻，先失波機會高。