新特蘭追擊病“魔”

新特蘭追擊病“魔”

今晚有場英格蘭聯賽盃四強首回合，由新特蘭對曼聯，新特蘭目前喺聯賽非常“手緊”，場場波都要搏命搶分護級；不過，既然聯賽盃都殺到入四強，都唔理得咁多，有機會捧盃當然會去到盡，況且對手曼聯呢期病到不得了，仲唔趁“魔”病，攞佢命。

“老莫”接手紅魔之後變咗“黑”魔，聯賽輸畀熱刺後，衛冕機會已經變得渺茫，足總盃又被淘汰，“老莫”又做出一個“新紀元”，如果呢個聯賽盃又失利的話，咁就恭喜晒，曼聯隨時得個社區盾聊勝於無。

牌面上新特蘭的確不及紅魔，但以曼聯目前咁嘅狀態，真係不敢恭維，打鬥心與士氣，再加主場之利，新特蘭一定比呢班“病魔”強，初盤曼聯要讓半球／一球，捧硬新特蘭坐和冇輸。

聯賽榜包尾嘅新特蘭近期有好轉，近七戰只曾一敗，雖然和波多，但總算開始踏入正軌，何況呢班波癲起上嚟都幾得人驚，上圈淘汰車路士，聯賽又曾經做低曼城，即使今晚贏埋曼聯，都唔算出奇。

紅魔唔單止傷痕累累，傷兵亦唔少，雲佩斯、朗尼、費蘭尼、蘭尼、菲爾鍾斯及拉菲爾等，實力大打折扣，可以踢得嘅狀態又低沉，“老莫”真係有排愁。

推介：新特蘭1：0