意甲重頭戲，ＡＣ米蘭主場對拿玻里，兩隊同樣今季換帥，但表現卻有天壤之別。ＡＣ由米赫洛域接手執教，兼大灑金錢增兵，但成績仍然冇起色。反觀，拿玻里喺沙利領軍下，愈戰愈勇，射手希古恩大踢爭氣波，今季聯賽已轟入5球，遇上防線脆弱嘅ＡＣ米蘭，大把搵食機會，平手盤捧拿玻里。

（TVB 301周一凌晨2時45分直播）

米赫洛域教ＡＣ唔掂檔

一代罰球王米赫洛域之前執教森多利亞，做得有聲有色，但呢位前國米人去到ＡＣ，光環盡失，即使簽入兩位著名射手卡路士巴卡、雷斯阿祖安奴，但聯賽6戰只有3勝3負，令人失望。特別係防線毫無改善，每場都有失波，米赫洛域用2,500萬歐元收購嘅中堅阿利斯奧羅馬洛尼未夠班踢大球會，漏甩多多，上仗仲攞埋紅牌，今場需要停賽，令米帥手上後防人腳更少選擇，情況實在危危乎。

拿玻里新帥沙利過往僅執教細球會，轉投拿玻里之後，終於打出名堂，帶領球隊近5仗取得4勝1和，包括大炒拉素5比0，上輪意甲亦以2比1擊敗祖雲達斯。上季季尾多次浪費入波機會，令球隊痛失歐聯入場券及歐霸盃冠軍嘅希古恩，大踢爭氣波，6場聯賽已入5球。由於佢落選最新一期阿根廷國家隊名單，睇來要交出更多功課，先可以重奪國家隊席位。希古恩近4次對ＡＣ，總共射入4球，有力再數胡。