雖然今晚歐洲聯賽有唔少重量級大戰，但阿King就睇中聽朝嘅美職，其中西岸第四嘅西雅圖海灣者會喺主場迎戰西岸「一哥」洛杉磯銀河。海灣者近期表現唔錯，喺主場已經連贏五仗，由於仲有機會爭逐西岸冠軍，今仗主場面對近期客場表現唔算太好嘅銀河，絕對有力贏波。海灣者主場小讓平半，阿King捧上盤。

（TVB 301周一早上9時30分直播）

海灣者上周作客只能以1比1打和肯薩斯體育會，令佢哋未能重登西岸榜首，但近期已擺脫早前嘅頹勢，正逐步重拾季初嘅出色表現。假如海灣者今仗贏波，就可以在爭奪西岸冠軍嘅競爭上取得優勢，球隊今仗雖有後衞路文托利斯、安達斯哥利亞同前鋒卡爾文因傷唔踢得。不過，海灣者主場戰績實在出色，近五仗贏晒之餘仲轟入13球，其中箭頭馬田斯頻頻有波入，今仗有望喺銀河身上取得入球。

銀河上周主場擊敗FC達拉斯終止連續三場聯賽冇入波走勢，但今季作客表現真係好一般，開咧至今喺聯賽作客只係贏過兩場，對上一次喺聯賽客戰更以0比3慘敗喺皇家鹽湖城腳下。銀河今仗續有門將白賴仁柏克休戰，後衞杜治雲特同中場巴治奧胡斯迪上陣成疑，加上球隊近年作客對海灣者戰績平平，近六次輸咗四場，今仗相信都係凶多吉少。

ＦＣ達拉斯夠贏侯斯頓

其餘美職，ＦＣ達拉斯雖有後衞蘇馬爾及門將丹堅尼地休戰，但球隊一向靠主場搵食，面對有守將謝美泰萊仲要抖嘅侯斯頓戴拿模，主W咪錯過。

（TVB 301周一清晨5時直播）科羅拉多急流前鋒奇雲杜里同杜明尼基巴積缺陣影響球隊攻力，皇家鹽湖城中場查維亞摩拉利斯唔踢得，作客相信會以穩陣行先，一於揀細盤。