巴塞地上最殘捱細界

爆傷兵潮難炒西維爾
今晚西甲焦點之戰必選西維爾主場對巴塞隆拿，「地上最強」巴塞非常黑仔，傷完一件又一件，繼美斯長抖之後，隊長恩尼斯達亦喺周中歐聯受重創，球隊中前場人腳捉襟見肘，殘陣加上剛經歷歐聯激戰，真係苦不堪言，今仗無力炒起對手。至於西維爾近況亦麻麻，估計難威脅巴塞大門，隨時疊埋心水「泊大巴」博攞一分，Mic少捧入球細。

（now 632周六晚10時直播）

巴塞現時傷兵一大籮，包括巨星美斯、中場恩尼斯達、拉芬拿艾簡達拿、後衞華美倫、杜格拉斯彭利拿、艾迪安奴、門將哥迪奧巴禾。教練安歷基上仗歐聯被迫用小將辛度拉美利斯打正選，但表現未如理想，幾乎輸畀利華古遜。美斯、恩尼斯達缺陣，尼馬狀態亦差，今場靠晒蘇亞雷斯食胡，攻力肯定打折扣。

巴塞另一大問題係防線太弱，碧基更經常犯錯成為球隊計時炸彈，早前作客1比4大敗於切爾達腳下，呢位西班牙國腳就兩次送禮，情況令人擔憂。由於巴塞上仗歐聯陷於苦戰，耗力甚多，今仗想主動搶攻都有心無力，更加要提防被對手偷襲，預料佢哋唔會冒進。

西維爾泊大巴博１分
西維爾今季成績大倒退，六場聯賽僅一勝，周中歐聯更吞祖雲達斯兩蛋。呢支上屆歐霸盃盟主只屬中型班，人腳難以兼顧西甲及歐聯兩條戰線，否則搞到兩頭唔到岸。以西維爾現時境況，睇怕都唔敢奢望贏到巴塞，相信會屯重兵防守博攞一分。巴塞人腳不整，亦好難咬入西維爾，入球細屬首選。