C朗501 瞄準馬體會再開殺戒

梅開二度創紀錄助皇馬贏波
C朗拿度榮登士哥之神！皇家馬德里昨晨喺歐聯A組作客2:0輕取馬模，萬眾期待嘅一刻終於來臨，葡萄牙球星C朗打破入球荒兼「起孖」，職業生涯入球突破500大關，同時追平魯爾成為皇馬史上入波最多球員。C朗喺馬德里打吡前及時回勇，咁啱馬體會更加係C朗最愛「點心」之一，睇嚟「戰神500」又可以開殺戒！

自上輪分組賽對薩克達入3球後，C朗一直喺職業生涯499球關口停滯，罕見連續3場賽事交白卷，今場對住馬模終於有突破，上下半場各入1粒帶領皇馬贏2:0。呢兩個入波分別係C朗第500球同501球，當中為皇馬攻入嘅323球，亦追平名將魯爾嘅皇馬紀錄，魯爾賽後亦喺twitter送上祝賀，並寄語C朗「再幫皇馬入多300球！」

解除「封口令」 一問碧基即黑面
C朗賽後心情大靚，甚至解除同傳媒嘅「封口令」，7個月來首度接受訪問，不過有記者重提上年碧基對佢嘅諷刺，C朗就黑面反擊：「呢條唔係聰明嘅問題，你哋要醒目啲，點解要講5個月前嘅負面新聞？點解要畀陷阱我踩？呢條問題有咩價值？」好在C朗事後仍然風騷，喺社交網慶祝突破500球，而且不忘為贊助商波砵宣傳，認真識撈。

C朗復甦對皇馬係及時雨，事關周一凌晨佢哋就要作客大戰馬德里體育會，更加令人振奮嘅係，據報加里夫巴利、占士洛迪古斯同沙治奧拉莫斯都傷愈復出，可以助C朗一臂之力！翻查數據，C朗501個入球之中，有51球係由賓施馬同加里夫巴利助攻，2人齊列C朗最愛拍檔前4名，「BBC」組合重現絕對威力十足。

事實上，馬體會亦位列畀C朗入波最多嘅4支球隊之一，呢位葡萄牙射手曾15次攻陷馬體會大門，嚟緊佢入多1球就可以超越魯爾獨佔皇馬史上No.1射手，點會唔肉緊先？馬體會昨晨喺歐聯C組主場1:2不敵賓菲加，連埋聯賽已經連輸2場，頹爆出戰馬德里打吡真係好牙煙。

澳洲模特兒Aline 自爆請C朗食檸檬
人紅自然是非多，英國《每日郵報》報道，澳洲模特兒Aline日前自爆畀C朗騷擾，話皇馬今夏去澳洲集訓嗰陣，C朗不斷喺社交網要求女方傳做Gym相，又拎電話號碼又送波飛，Aline表明自己已有男友後，C朗更回應：「冇人會知呀Baby。」不過Aline最終堅持請C朗食檸檬。