哈利仔歸位 熱刺降「摩」

哈利仔歸位 熱刺降「摩」

哈利卡尼歸位，熱刺重新起航！上季勁入31球嘅「哈利仔」，上輪英超終於開齋，仲帶領球隊以4:1大勝曼城，呢支倫敦球隊嘅信心返晒嚟，今晚喺歐霸盃J組次輪賽事造訪有前冇後嘅摩納哥，受讓平半梗要撐2.1倍下盤啦！

（now670台周五凌晨1:00直播）

近5場波贏足4場嘅熱刺，上場英超大勝曼城踢出代表作，球隊戰績重新起飛，但最令Fans高興嘅係「哈利仔」終於搵番射門鞋，況且有孫興民加盟幫輕吓佢，相信呢位「三獅神箭」入波肯定陸續有嚟。賽前領隊普捷天奴收到好消息，一對中場迪比利及賴恩美臣傷愈可候命，目前只係得番賓達納呢位十字軍，兵源非常充足。

摩納哥近3戰失8粒
主隊摩納哥近3場法甲勁入8球，不過同時都失咗8球，3戰入面贏得1場，主帥查甸都話防守唔掂係佢哋嘅致命傷，仲批評隊波經常保唔住領先優勢，炮轟班手足唔夠集中！仲有，中場艾達馬查奧爾因傷肯定缺陣，攻擊中場摩天奴同左閘法比奧干查奧亦未必趕及傷愈，防線唔掂加上唔齊腳，點讓得起熱刺呀，進取嘅不妨直敲3.5倍客勝都仲得。