巴甲戰火重燃 保地花高地頭做大士_東方日報

聽朝有巴甲重開，頭場之一由保地花高主場迎戰山度士。保地花高今季聯賽入得又失得，尤其主場出擊例搶韁，山度士雖然冇尼馬同加比爾巴保沙，但同樣重攻輕守，鬥攻格局實多波入，2.5球入球大咪錯過。文:法達斯維

（周五早上6時30分開賽）

隨住巴西於世盃16強止步，巴甲亦喺今個周中重燃戰火，保地花高主場鬥山度士最有睇頭。保地花高之前因分心南球盃，搞到聯賽表現時好時壞，近6場聯賽贏得1場咁大把，兼且場場有失波，難怪只係位處中游。好彩保地花高喺南球盃順利晉級，依家可以重新投入番聯賽，不過睇番佢哋今季17輪聯賽，入31球失31球，單計近7次聯賽主場出擊，全開3球或以上，喺自己地頭比賽分外進取。

山度士護級以攻代守
另邊廂，山度士肯定有剛為巴西戰罷世盃嘅尼馬放假缺陣，另一前鋒加比爾巴保沙上仗聯賽做「紅牌阿姑」，今仗要坐波監，幸好仍有摩西斯韋拉、路希斯拿等撐起鋒線，以佢哋今季17輪聯賽入26球嘅攻力，索性以攻代守。雖然山度士依家排緊第15位，但其實只落後第12位嘅保地花高1分，為免被捲入護級漩渦，今仗必搏命搶分，加上各項賽事近6場全開3球或以上，捧大盤更上算。