2026世界盃：如有神助唔係虛火 佛得角氣細勁頂住阿根廷_東方日報

世盃32強矚目之戰，阿根廷撲擊「新丁」佛得角，上屆冠軍阿根廷實力遠勝對手，贏面相當高，但非洲奇兵佛得角3戰不敗，強如西班牙亦未能攻破其大門，完美演繹「攔路虎」角色，40歲鋼門禾仙夏表現如有神助，估計阿根廷炒唔起對手，小勝居多。由於阿根廷主W太熱冇肉食，參考佢哋近5場有4次總入球開3球或以下，寧願博入球細[3.5球]。

(Now 618及616周六早上6時直播)文:Mic少

阿根廷盡顯王者霸氣，首2場分別贈阿爾及利亞3蛋，贏奧地利2比0，提早鎖定小組首名出線席位，上仗輪換人腳，留力踢淘汰賽，導致近6場比賽首次失波，但仍然以3比1輕取約旦。阿根廷今仗恢復強陣出擊，以認真態度比賽，相信佛得角入唔到波。

美斯識玩唔會場場搏
至於呢支南美洲勁旅會唔會大炒對手，相信機會唔大，皆因賽程頻密，加上晉級之後，對手愈來愈強，必須謹慎分配體力，先至係爭冠上策。就算球王美斯狀態大勇，連續3場入波有6球進帳，但畢竟佢已經39歲，唔可能每場都搏盡，預料阿根廷只要先入波，就會放慢比賽節奏，控制戰局至完場。

禾仙夏一夫當關士氣盛
另邊廂，佛得角心態同阿根廷完全唔同，難得首度參加世盃決賽周，鬥志特別旺盛，每場都當成決賽咁踢，總之搏盡無悔，唔會考慮下場比賽，亦係佛得角能夠守和歐國盃冠軍西班牙0比0嘅主因，加上同「南美3哥」烏拉圭打成平手，證明絕非虛火，為今仗對阿根廷，打下一支強心針。

事實上，佛得角球員除咗拚勁十足，人腳質素亦唔差，多位球員喺葡萄牙等歐洲聯賽搵食，加上門將禾仙夏一夫當關，贏盡口碑亦可提升隊友信心。佛得角今仗唯一戰術，必定係「泊大巴」死守，希望守至互射12碼，屆時就有機會爆冷晉級。